Ča je život vengo fantažija
To je bilo ka u priči
Roko nije jema ništa,
Cicibela još i manje,
Ali ljubav sve izliči.
on je bija anarkišta
jemali su i kumpanje
To je bilo ka u priči
punoj lustri i friškina
ma je isto priča prava
čulo se i grubi riči
bumbilo se puno vina
bolila je dikod glava
Trči vrime, cvili maška
traje jubav pusta, siromaška
šaka suza, vrića smija
ča je život vengo fantažija
To je bilo ka u priči
živili su ka golubi
i nosili svoje brime
s puno srca, s malo riči
goli, bosi, gladni, grubi
volili se cilo vrime
To je bilo ka u priči
kad su bili puno jidni
bombe, rašpre, livorvere
i još druge strašne riči
vikali su oni bidni
ma su prošle te nevere
Trči vrime, cvili maška
traje jubav pusta, siromaška
šaka suza, vrića smija
ča je život vengo fantažija
To je bilo ka u priči
malo sriće, puno jada
puno zime i propuva
ali jubav sve izliči
boje vengo sto balada
boje vengo struca kruva
To je bilo ka u priči
ma ih više ovud nima
na dnuj mora su gajete
sve beštimje grube riči
sve je prošlo poput dima
vrime metlom sve pomete
